पुष्पकमल दाहाल प्रचण्ड र माधवकुमार नेपाल कांग्रेसलगायत अन्य दलहरुसँग छलफल गरेर संयुक्त आन्दोलन गर्ने प्रयत्नमा लाग्दा आन्दोलन सार्वजनिक गर्न चार दिन ढिलाइ भयो । अन्ततः यो समूहले शनिबार एकलरुपमै आन्दोलन घोषणा गर्‍यो ।

विघटित संघीय संसदमा रहेका दलहरु नेपाली कांग्रेस र जनता समाजवादी पार्टी (जसपा) सरकारबाट चोइटिएको समूहसँग संयुक्त आन्दोलन गर्न राजी भएनन् ।

दुबै दलहरु संयुक्त आन्दोलनका निम्ति तयार नभएपछि प्रचण्ड–माधव समूहले आफ्नो तर्फबाट संघर्षको कार्यक्रम घोषणा गर्‍यो । जसमा, पुस २१ गते संघीय राजधानी र विभिन्न शहरी केन्द्रहरुमा राजनीतिक पार्टीहरुसँग अन्तरक्रिया गर्ने भनिएको छ ।

कांग्रेस र जसपा प्रचण्ड–माधव समूहसँग मिलेर संयुक्त आन्दोलन गर्न राजी नभएपछि प्रचण्ड–माधव समूहले पेरिसडाडाँमा पत्रकार सम्मेलन गरी संघर्षको कार्यक्रम सार्वजनिक गरिरहँदा कांग्रेस र जसपाले पनि आ–आफ्नै ढंगले संघर्षका कार्यक्रमहरु तय गरेका छन् ।