नेपाल आज नेपालमा मात्र छैन । नेपाल आज विश्वभरि फैलिसकेको छ । कतारमा कतारी जनसङ्ख्याभन्दा बढी नेपाली छन् । यस्तो लाग्छ– कतारमा सिङ्गो नेपाल छ, जात छ, धर्म छ, सम्प्रदाय छ, चाडबाड छ, लिङ्ग र वर्ण पनि छ । सानो तर सम्पूर्ण नेपाल कतारमा छ । श्रमिक छन् । दक्ष श्रमशक्ति छन् । व्यवसायी छन् । कामदार छन् । घरेलु कामदार छन् । उद्यमी छन् । उद्योगी छन् । आयातकर्ता छन् । निर्यातकर्ता छन् । साझेदार छन् । सहकर्मी छन् । साहू छन् । बिचौलिया छन् । नेता छन् । अभिनेता छन् । लेखक छन् । पत्रकार छन् । कवि छन् । कलाकार छन् । साहित्यकार छन् । मजरामा नेपाली छन् । भेडीगोठमा नेपाली छन् । यहाँ पार्टीका वर्गीय सङ्गठनहरुमात्र छैनन् मेचीदेखि महाकालीसम्मका छुट्टाछुट्टै आवाज समेटिएका विभिन्न नेपाली समूहहरु छन् ।

भलो गर्ने नेपाली छन् । कुभलो गर्ने पनि नेपाली नै छन् । दिदीबहिनी छन् । दाजुभाइ छन् । त्यहीँ गएर विवाह गर्ने नेपाली पनि छन् । कथाव्यथा नेपालीका धेरै छन् यो कतारमा । त्यसैले लाग्छ– नेपाल कतारमै छ ।

नेपालीहरु हरेक व्यवसायमा छन् । सहरमा छन् । गाउँमा छन् । बन्दीगृहमा छन् । जहाँतहीँ छन् नेपाली । कतारमा बनेका सबैजसो भवनमा र कतारको बालुवाको कण–कणमा नेपाली पसिना मिसिएको छ ।